ደብረ ብሥራት ቅ/ገብርኤል የኢት/ኦ/ተ/ቤ/ክርስቲያን በፊኒክስ የአገልግሎት ሕንጻ ቤ/ክርስቲያን ግዢ ተጠናቆ በሀገረ ስብከቱ ሊቀ ጳጳስ ብጹዕ አቡነ ቴዎፍሎስ ተባርኮ አገልግሎት መስጠት ጀመረ። ኅዳር 7 2016 ዓ/ም ወይም እ.ኤ.አ Nov 17, 2023 ሕንጻ ቤተ ክርስቲያኑ በሀገረ ስብከቱ ሊቀ ጳጳስ ብጹዕ አቡነ ቴዎፍሎስ ዶ/ር ተባረከ። ቅዳሴ ቤቱ ኅዳር 8 2016 ዓ/ም ወይም እ.ኤ.አ Nov 18, 2023 በተለያዩ መንፈሣዊ አገልግሎቶች የተከበረ ሲኾን ብጹእነታቸው ባስተላለፉት መልዕክት የእግዚአብሔርን ቤት ለመሥራት በእግዚአብሔር የመመረጥ እድል ያስፈልጋል ብለዋል። ስለኾነም ይህን ሕንጻ በአጭር ጊዜ በጥቂት የምዕመናን ቁጥር አስተዋጽዖ እና ጥረት መግዛት በእግዚአብሔር መመረጥ እና መታደል ስለኾነ እንኳን ደስ አላችሁ ብለዋል። ሌሎች በሀገረ ስብከቱ ሥር ያሉ አብያተ ክርስቲያናትም በየጊዜው ፕሮጀት በመንደፍ በአጭር ጊዜ እና በአነስተኛ የምዕመናን ወይም የአገልጋዮች ቁጥር አጥቢያቸውን ለማሳደግ እያደረጉ ያለው እንቅስቃሴ ኢትዮጵያውያን ለእምነታቸው እና ለሃይማኖታቸው ያላቸውን ቁርጠኝነት እና ጽናት የሚያሳይ ስለኾነ በፊኒክስ ያሉ ወጣቶች ይኽን የእምነት ጽናት ጠብቀው ሌሎች በእግዚአብሔር ያላመኑ አሕዛብ ወደ እምነቱ እንዲሳቡ ምክኛት ሊኾኑ ይገባል ብለዋል። በዚህ የሕንጻ ግዢ ታሪካዊ ጉዞ አሻራ ላኖሩ የደብሩ ምዕመናን እና የደብሩ አስተዳዳሪ መልአከ ብሥራት ቀሲስ ገብረ እግዚአብሔር የሀገረ ስብከቱ ሊቀ ጳጳስ ብጹዕ አቡነ ቴዎፍሎስ ዶ/ር አባታዊ ቡራኬ እና ቃለ በረከት አስተላልፈዋል።